Германија ги објави плановите за засилување на граничните контроли по март 2025 година, како дел од напорите за борба против илегалната миграција.
„Нашите сеопфатни мерки за ограничување на нерегуларната миграција и борба против криминалот со криумчарење функционираат“, рече министерката за внатрешни работи Ненси Фезер за весникот Аугсбургер Алгемајнен.
„Потребни ни се овие контроли додека заштитата на надворешните граници на ЕУ не биде значително зголемена“, додаде таа.
Во септември, Германија ги прошири граничните контроли на источната и јужната граница, за потоа да ги вклучи запандата и северната граница за шест месеци, наведувајќи ги како причина нелегалната миграција, прекуграничниот криминал и терористичките закани.
Граничните проверки веќе беа спроведени со Франција поради Олимписките игри во Париз и на границите со Полска, Чешка и Швајцарија од средината на октомври минатата година. Контролите на германско-австриската копнена граница се во тек од 2015 година.
Соседите на Германија, вклучувајќи ги Данска, Холандија, Белгија и Луксембург, се дел од Шенген зоната, каде што патувањето без гранични контроли е вообичаена пракса.
Привремените гранични контроли во Шенген зоната се дозволени само во исклучителни околности, како што се големи меѓународни настани или значителни закани за јавниот ред.
Притисокот врз Германија да се справи со илегалната миграција се засили по нападот со нож во Солинген минатиот август.
Одбиен сириски барател на азил, кој пристигна во 2022 година и кој требаше да биде депортиран во Бугарија, уби тројца, а повреди уште осум луѓе. Терористичката група ДАЕШ/ИСИС подоцна ја презеде одговорноста за нападот.
Германија, најголемата европска економија, останува водечка дестинација за нелгалните мигранти и барателите на азил. Минатата година властите забележаа 266.224 случаи на илегален влез и престој, при што повеќето мигранти доаѓаат од Сирија и Авганистан.
