Германија ги продолжи контролите на своите граници за уште шест месеци и за тоа ја извести Европската комисија, беше соопштено по состанокот на малцинската влада на Олаф Шолц.
„Преку граничните контроли успешно ја спречуваме нерегулираната миграција, како што јасно покажуваат бројките. Досега одвративме над 47.000 луѓе без валидни патни исправи на германските граници, бројот на барања за азил е намален за една третина во изминатата година, а уапсивме и 1.900 шверцери на луѓе“, изјави германскиот канцелар Олаф Шолц.
Тој рече дека Европската комисија го регистрирала продолжувањето на контролите на германските граници, кои требаше да завршат кон средината на март.
Министерката за внатрешни работи Ненси Фезер нагласи дека воведувањето контроли на сите граници резултирало со намалување на нерегуларната миграција.
„Ги спречуваме плановите на криминалците и екстремистите“, рече Фезер.
Владата објави и дека прекуграничниот сообраќај на луѓе и стоки бил „само малку попречен“.
Германија од есента минатата година воведе контроли на сите копнени граници.
Контролите кон Австрија беа воведени за време на мигрантскиот бран во есента 2015 година.
Пред парламентарните избори на крајот на февруари, во Германија се разви дебата за намалување на миграцијата, при што Христијанско-демократската унија ЦДУ/ЦСУ и десничарската АфД бараат да се отфрлат сите мигранти без валидни патни документи, вклучително и оние кои сакаат да побараат азил во Германија.
Партиите од левиот центар ги отфрлаат овие барања, повикувајќи се на уставното право да аплицираат за азил во Германија.
