Стотици десничарски екстремисти се бараат поради апсење во Германија, објави берлинскиот весник „Таз“ (Taz).
Според вчера објавениот извештај, до 30 септември постоеле отворени налози за апсење на 674 лица од крајната десница.
Информацијата ја објави Министерството за внатрешни работи како одговор на пратеничко прашање на радикално левичарската опозициска партија Левица.
Според информациите, 33 налози за апсење беа поврзани со „политички мотивирани насилни дела“, а 151 со „злосторства со десничарска мотивација“ како што е истакнување на неуставни симболи или поттикнување омраза.
Преостанатите случаи се однесуваа на општи кривични дела како што се кражба, финансиски измами и лажно добивање социјална помош.
„Во периодот од март до септември оваа година, законски се решени 326 потерници за лицата од десниот спектар“, соопштено е од Министерството.
Мартина Ренер од партијата Левица, која побара парламентарна истрага, повика на зголемен притисок во потрагата по десничарските екстремисти кои се во бегство.
„Голем број отворени налози за апсење покажува дека десничарското насилство е секојдневна закана дури и надвор од спектакуларните рации“, рече таа за весникот „Таз“.
Коалиционата влада на левиот центар на канцеларот Олаф Шолц, повеќе пати ветуваше дека ќе воведе посилни мерки за да се спротивстави на растечката закана од екстремно десничарските групи.
Земјата во последните години сведочеше на растечкиот расизам и ксенофобија поттикнати од пропагандата на екстремно десничарски, антисемитски и антимуслимански групи, вклучително и екстремно десничарската партија Алтернатива за Германија (AfD).
Тероризмот на крајната десница во Германија однесе животи на најмалку 218 луѓе од 1989 година, според фондацијата „Амадеу Антонио“ со седиште во Берлин.
Организациите за човекови права долго ги критикуваа властите поради потценување на заканите и несериозното истражување на злосторствата кои ги извршија неонацистите.
