Германскиот канцелар Олаф Шолц побара од претседателот Франк-Валтер Штајнмаер да го распушти парламентот откако беше изгласана недоверба на неговата Влада.
Од присутните 717 пратеници, 394 гласаа против Владата, 207 за, а 116 беа воздржани, изјави претседателот на Бундестагот Бербел Бас.
Штајнмаер сега има 21 ден да одлучи дали ќе го прифати барањето и ќе распише предвремени избори, како што сакаше Шолц кога побара гласање за доверба на неговата малцинска влада по распадот на неговата левичарска коалиција на почетокот на ноември.
Ако Штајнмаер го прифати барањето, предвремените избори мора да се одржат во рок од 60 дена.
Шолц предложи изборите да се одржат на 23 февруари.
Криза во владината коалиција почна откако канцеларот го разреши тогашниот министер за финансии Кристијан Линднер од Слободните демократи (ФДП) на почетокот на ноември по неколкумесечна жестока дебата за буџетот за 2025 година, па помалиот партнер ја напушти трипартиската коалиција, оставајќи го Шолц во малцинска влада со Зелените.
Говорејќи во парламентот во понеделникот попладне, Шолц ја оправда својата одлука да се гласа доверба во Бундестагот заради голем број важни политички прашања со кои се соочува Германија, вклучително и одамна задоцнетите инвестиции во заболената економија.
