Германскиот претседател Франк-Валтер Штајнмаер во петокот одлучи да го распушти Бундестагот и да го одреди 23 февруари како ден за предвремени парламентарни избори.
„Токму во тешки времиња како ова во кое се наоѓаме, за стабилност е неопходна ефикасна и стабилна влада со сигурно мнозинство во парламентот... Затоа сум убеден дека новите избори се вистинскиот пат во корист на нашите луѓе“, рече германскиот претседател објаснувајќи ја својата одлука.
Тој нагласи дека распуштањето на парламентот пред крајот на редовниот изборен период е „ретко во Германија“, но оти со оглед на тоа што канцеларот Олаф Шолц ја загуби довербата во Бундестагот, нема друг избор.
„За време на разговорите со претставниците на другите партии застапени во Бундестагот, се покажа дека не е можно да се формира мнозинство“, рече Штајнмаер.
Тој нагласи дека немањето мнозинство во Бундестагот не значи дека парламентот е блокиран.
„Нашата демократија функционира и во преодниот период“, рече германскиот претседател.
Тој ги повика претставниците на политичките партии да водат фер изборна кампања „полна со почит кон политичките противници“.
На 16 декември, на германскиот канцелар Олаф Шолц му беше изгласана недоверба во Бундестагот во гласањето што тој самиот го иницираше.
На почетокот на ноември, со разрешување на министерот за финансии од редовите на Либерално-демократската партија поради конфликт околу буџетот, иницираше колапс на коалициската влада и одржување на предвремени избори.
Работата на социјалдемократско-либерално-зелената влада под водство на социјалдемократот Олаф Шолц е придружена со внатрешни конфликти од нејзиното формирање пред три години.
