Група од 19 студенти од Универзитетот Браун во Соединетите Американски Држави (САД) веќе шест дена штрајкува со глад во знак на протест против израелскиот геноцид врз палестинскиот народ.
Овие студенти преку универзитетскиот весник „Браун дејли хералд“ побараа од раководството на овој престижен американски универзитет од државата Род Ајленд да повика на воспоставување прекин на огнот во Појасот Газа и за ликвидација на компаниите кои профитираат од прекршувањето на човековите права.
Од лидерите на Универзитетот беше побарано на состанокот на одборот денеска и утре да гласаат за одлука со која ќе се елиминира соработката на Универзитетот Браун со компании кои се соучесници во израелските прекршувања на човековите права против Палестинците.
„Сè додека нашиот универзитет инвестира во компании кои ја поддржуваат израелската окупација, ние сме исто така соучесници. Наша одговорност е да дадеме сѐ од себе за да ја искористиме нашата привилегија и да го принудиме нашиот универзитет да го слушне нашиот апел. Геноцидот, расизмот и окупацијата се погрешни“, изјави за студентскиот весник студентката Нијанта Непал, една од студентите на штрајкот.
Група од 19 студенти, предводени од палестински и еврејски студенти, се собраа во кампусот на Универзитетот на 2 февруари облечени во маици на кои пишуваше „Штрајк со глад за Палестина“. Тие најавија штрајк со глад на неопределено време додека корпорацијата Браун не ја прекине соработката и трговијата со компаниите кои го поддржуваат Израел.
Веста за овој штрајк секојдневно се споделува на социјалните мрежи од страна на активистичката група американски Евреи наречена „Евреи за примирје сега“, која исто така повикува на прекин на огнот во Газа.
Стотици студенти секојдневно се собираат во кампусот и им даваат поддршка на своите колеги кои штрајкуваат со глад, а се очекува утре на штрајкот да се приклучат уште 200 студенти.
Од друга страна, ректорот на Универзитетот Браун, Кристина Паксон, минатата недела изјави дека не планира на состаноците на Управниот одбор да го стави на дневен ред прашањето за соработка со компаниите кои го поддржуваат Израел.
Во кампусот на Универзитетот Браун претходно се одржаа протести на кои студентите бараа прекин на огнот во Појасот Газа, а досега се приведени најмалку 60 студенти.
На протестите учествува и Хишам Артани, студент на Универзитетот Браун со палестинско потекло, кој беше цел на расистички напад во Вермонт во ноември со уште двајца пријатели муслимани и оттогаш е неподвижен.
