Грузија објави дека ја повлекува својата делегација од Парламентарното собрание на Советот на Европа (ПССЕ) откако ова тело усвои резолуција со која се бара од земјата да организира нови парламентарни избори, јавува Анадолу.
ПССЕ ја усвои резолуцијата со 114 гласа, со која ги потврди мандатите на членовите на грузиската делегација, но побара од Тбилиси да се справи со „континуираното и забрзано назадување на демократијата“ во земјата.
Во резолуцијата, исто така, се повикува на создавање средина што ќе овозможи „вистински демократски нови парламентарни избори што ќе бидат најавени во наредните месеци“ и укинување на контроверзниот закон за странско влијание, усвоен во јуни минатата година.
„Ние, членовите на грузиската парламентарна делегација во Стразбур и Тбилиси, дебатиравме и со колективна одлука на тимот на Грузиски сон од денес ја прекинуваме нашата работа во Парламентарното собрание“, изјави Теа Цулукијани, шефица на грузиската делегација во ПССЕ од Стразбур.
Цулукијани истакна дека многу поединци, особено од опозицијата и невладините организации, се спротивставиле на признавањето на новата грузиска парламентарна делегација, но ПССЕ, иако ги призна нивните мандати, истовремено поставило одредени услови што, според неа, се „неприфатливи“ за Тбилиси бидејќи се „неправедни и неосновани“.
Таа го дефинираше условот за одржување нови парламентарни избори како „целосно неприфатлив“, нагласувајќи дека тоа ги „игнорира волјата и реалноста на над 1.120.000 гласачи“.
„Веруваме дека сè додека продолжува целосно неправедното и неосновано уценување на избраната Влада на грузискиот народ, нема значење нашето учество во Собранието“, изјави таа, додавајќи дека делегацијата ќе се врати во ПССЕ само ако се смени односот кон Грузија и се сфати дека притисокот врз земјата нема да ја натера да преземе никакви „антигрузиски акции“.
На 26 октомври минатата година владејачката партија Грузиски сон освои 89 места во Парламентот со 150 места, добивајќи 53,93 отсто од гласовите на парламентарните избори.
Иако официјалните лица на Грузиски сон го поздравија резултатот, тогашната претседателка Саломе Зурабишвили, која се смета за проевропски ориентирана, изјави дека не ги признава резултатите, тврдејќи дека изборите биле дел од „руска специјална операција“ што опозициските партии ги нарекоа „украдени“.
