Лидерите на палестинското движење Хамас ги повикаа светските лидери да ја напуштат салата за време на денешното обраќање на израелскиот премиер Бенјамин Нетанјаху на Генералното собрание на Обединетите нации, со цел да изразат протест против израелските напади во Појасот Газа.
„Напуштањето на салата е најмалку што може да се направи за да се изрази отфрлање и осуда на тековниот геноцид во Газа“, рече во изјавата еден од претставниците на Хамас, Изат ал Ришк.
Ришк го нарече Нетанјаху „мал Хитлер“, обвинувајќи го дека го организирал масовното убивање на палестинските цивили во Газа и Либан.
„Нетанјаху уби повеќе од 41.000 цивили, вклучително и 17.000 деца и околу 200 новороденчиња во Газа“, рече Ришк, додавајќи дека цел на израелските напади биле болници, џамии, цркви и кампови за раселените лица.
Тој додаде дека Нетанјаху го продолжува нападот со целосно непочитување на резолуцијата на Советот за безбедност на ОН која повикува на итен прекин на огнот и игнорирајќи ги наредбите на Меѓународниот суд на правдата.
„Овој човек треба да биде уапсен и да одговара за своите злосторства“, рече Ришк, повикувајќи ги светските лидери да го бојкотираат говорот и да не му ја дадат платформа на Нетанјаху.
Прекршувајќи ја резолуцијата на Советот за безбедност на ОН која повикува на итен прекин на огнот, Израел ја продолжува бруталната офанзива врз Газа што ја започна по прекуграничниот напад на Хамас на 7 октомври.
Повеќе од 41.500 луѓе, главно жени и деца, оттогаш се убиени, а повеќе од 96.000 се повредени, според локалните здравствени власти.
Израелскиот напад го раселе речиси целото население на Газа поради тековната блокада и големиот недостиг на храна, чиста вода и лекови.
Израел, исто така, се соочува со обвиненија за геноцид пред Меѓународниот суд на правдата.
