Кинескиот и рускиот претседател Кси Џинпинг и Владимир Путин денеска разговараа за зајакнување на стратешката соработка меѓу нивните земји и за неодамнешните контакти на Москва со Вашингтон, се вели во соопштението на Кремљ.
При телефонскиот разговор меѓу Кси Џинпинг и Владимир Путин тие размениле мислења за понатамошниот развој на нивното сеопфатно партнерство и стратешка соработка.
„Се разговараше за начините за проширување на заемно корисната соработка на полето на економијата и трговијата, инвестициите, културата, образованието и спортот“, се вели во соопштението.
Двајцата лидери, исто така, го потврдија распоредот на претстојните состаноци на високо ниво, вклучувајќи ја прославата на 80-годишнината од победата во Втората светска војна и овогодинешниот самит на Шангајската организација за соработка.
Ова беше втор телефонски разговор меѓу двајцата откако американскиот претседател Доналд Трамп ја презеде функцијата минатиот месец. Времето на телефонскиот разговор се совпаѓа и со третата годишнина од војната на Русија против Украина, која започна на 24 февруари 2022 година.
„Владимир Путин го информираше кинескиот претседател за неодамнешните руско-американски контакти. Кинеската страна изрази поддршка за тековниот дијалог меѓу Русија и САД и нејзината подготвеност да помогне во изнаоѓањето мирно решение за украинскиот конфликт“, се вели во соопштението.
Лидерите истакнале дека руско-кинеското партнерство останува клучен стабилизирачки фактор во глобалните работи, нагласувајќи дека тоа не е насочено против ниту една страна.
