Киев: Во руските напади оштетена енергетската инфраструктура

Градоначалникот на украинскиот главен град Киев Виталиј Кличко, изјави дека енергетската инфраструктура е оштетена во руските напади во текот на ноќта и утрово.

Преку својот профил на социјалната мрежа Телеграм, Кличко објави дека врз Киев е изведен напад со беспилотни летала.

Тој наведе дека украинските сили на противвоздушната одбрана уништиле вкупно 40 беспилотни летала во Киев и околните региони.

„15 беспилотни летала уништени се во соседните региони, три во Киевскиот регион и 22 над главниот град“, рече Кличко и додаде дека „градската енергетска инфраструктура е оштетена“.

Додаде дека поради нападите дошло до прекин во напојувањето со електрична енергија во градот и дека има проблеми во системите на греење.

Кличко исто така потврди дека денес во болницата почина цивил кој бил тешко повреден на 31 декември во ракетен напад врз Киев.