„Сите страни мораат сериозно да учат од тешките лекции од украинската криза“, порача кинескиот министер за надворешни работи Ванг Ји.
„Настрана од сериозното влијание врз Европа, украинската криза произведе негативни консеквенции кои се шират во светот“, рече Ванг Ји во телефонскиот разговор со неговиот унгарски колега Петер Сијарто.
„За доброто на долгорочните интереси, сите страни треба да истражуваат градење на балансирана, ефективна и одржлива европска безбедносна архитектура за постигнување траен мир и безбедност“, нагласи Ји, се наведува во соопштението на кинеското МНР.
Ванг исто така повтори дека „Кина не е страна во украинската криза“, осврнувајќи се на критиката насочена кон Пекинг за неговото одбивање директно да ја осуди војната на Русија во Украина.
„Ние не поддржавме ниту ќе додадеме масло на огнот. Ние секогаш непоколебливо и истрајно промовиравме мировни преговори“, рече тој.
На состанокот на министрите за надворешни работи на Г20 во Индонезија претходно овој месец, Ванг рече дека неговите колеги на самитот биле „длабоко загрижени околу ова (украинската криза) и Кина започна иницијатива во однос на обезбеденоста со храна и енергија“.
„Кина никогаш не била ривал на Европа“
За време на разговорот, Сијарто нагласил дека Кина никогаш не била „ривал на Европа туку партнер кој носи можности за соработка“, се додава од кинеското Министерство за надворешни работи.
Тој го информирал Ванг за моменталната ситуација во Европа „особено за економските и финансиските предизвици со кои се соочува Унгарија во однос на последиците од украинската криза“.
„Унгарија ќе продолжи да се посветува на промовирање на соработката помеѓу ЕУ и Кина, која вклучува меѓусебна почит, правичност и заеднички бенефит“, порача Сијарто.
