Левичарскиот сојуз Нов народен фронт (НФП), кој победи во вториот круг од предвремените парламентарни избори во Франција, обезбеди 178 места во Парламентот, објави денес француското Министерство за внатрешни работи, укажувајќи дека ниту една политичка партија или сојуз нема да може самостојно да ја формира следната влада.
Според изборните резултати објавени од Министерството, Сојузот на четири левичарски партии НФП го освои мнозинството во Националното собрание во вториот круг од вонредните избори на 7 јули, освојувајќи 178 мандати.
Партијата на претседателот Емануел Макрон освои 150 места во Парламентот, додека екстремно десничарскиот Национален собир (РН) освои 125.
„Одѕивот на гласачите изнесуваше 66,6 отсто“, се наведува во официјалното соопштение.
За апсолутно мнозинство потребни се 289 пратеници во Парламентот.
Бројот на места во сојузот на Макрон, кој моментално има 250 пратеници, е намален на 150.
Бројот на пратеници на РН се зголеми од 89 на 125, додека левичарскиот сојуз НФП сега има 178 места, што е повеќе од 150 претходно.
Првиот круг од изборите се одржа на 30 јуни со излезност од над 65 отсто, кога гласаа над 49 милиони гласачи. РН доби 29,26 отсто од гласовите, НФП доби 28,06 отсто, а Заедно за Републиката околу 20,04 отсто.
Францускиот претседател Емануел Макрон го распушти Парламентот и најави предвремени избори откако РН освои повеќе од 31 отсто од гласовите на изборите за Европскиот парламент на 9 јуни.
