Новата либанска влада денеска доби доверба во националниот парламент по говорот на либанскиот премиер Наваф Салам, кој вети дека ќе изврши притисок за економски и финансиски реформи и ќе започне преговори со Меѓународниот монетарен фонд.
„Работиме на отстранување на Либан од црната листа и започнување преговори со Меѓународниот монетарен фонд“, рече премиерот Салам пред гласањето во парламентот.
Владата на Салам доби поддршка од 95 пратеници од вкупно 128 места, пренесува Ројтерс.
Новата либанска влада, која има 24 министри, беше формирана на 7. февруари, по повеќе од три недели преговори меѓу ривалските политички партии.
Во вторникот, либанската, проиранска милитантна група Хезболах, исто така, ѝ даде поддршка на новата влада.
Либанската влада беше формирана по директна американска интервенција, а тоа ќе го приближи Либан до пристап до фондовите за обнова по минатогодишната војна меѓу Израел и либанската милитантна група Хезболах.
По двегодишен ќор-сокак, либанскиот парламент во јануари го избра новиот претседател на Либан, Џозеф Аун.
Тоа беше 13-ти пат либанските пратеници да гласаат за избор на претседател на земјата.
Либан е без претседател од октомври 2022 година, кога му истече мандатот на Мишел Аун.
Либан е во длабока економска криза од 2019 година, кога колабираше финансискиот систем на земјата, оптоварен со огромни јавни долгови.
