Францускиот претседател Емануел Макрон денеска изјави дека Европа мора да го заштити својот суверенитет, стратешката автономија и пазар, наместо да зависи од другите сили.
Тој на Самитот на Европската политичка заедница во Будимпешта рече дека разговарал со новоизбраниот американски претседател Доналд Трамп и дека се очекува тој да се грижи за американските интереси и дека Европа не смее да ја делегира својата безбедност на Америка.
Како што истакна, Европа не смее да биде „пасивна“ кога се во прашање светските настани, меѓу САД од една страна и Кина од друга страна.
„Тоа е стратешка улога што ние во Европа мора да ја сфатиме сериозно. Не можеме да ја оставиме нашата безбедност на Американците. Без разлика дали сте членка на Европската унија или не, ние мора да се погрижиме да имаме европски преференци во нашето индустриско производство. Мораме да се погрижиме да имаме безбедност во нашите земји, на југ, на исток, на запад“, рече Макрон.
Тој предупреди дека Европа не смее да дозволи Русија да ја добие војната во Украина бидејќи во тој случај, како што наведе, на границите на Европа ќе има империјална сила.
Зборувајќи за војни, Макрон ги повика и Азербејџан и Ерменија да го почитуваат договорот за прекин на огнот и да изградат мир.
„Мораме да кажеме дека не сакаме империјализам, не сакаме ревизионизам на границите. Ова е фундаментално прашање и ова е порака што ги застапува нашите интереси. Мораме да изградиме Европа која е одбранбена и способна, за да биде безбедна“, рече Макрон.
Францускиот лидер посочи дека е неопходно да се зачува европскиот либерален демократски модел и изрази надеж дека Грузија, по неодамнешните избори, наскоро повторно ќе го „потврди својот европски пат“.
Тој предупреди на другите предизвици со кои се соочува Европа, како што се тероризмот, сајбер нападите, илегалната миграција и климатските промени.
Францускиот претседател посочи дека Европа мора да се погрижи да биде обединета и да ги брани сопствените интереси
„Нашиот модел, отворен модел и модел на либерална демократија, е нешто што некои други сили ќе сакаат да го искористат“, рече Макрон и напомена дека балканските земји имаат многу проблеми со сајбер напади и дезинформации.
„Мораме да ги заштитиме нашите демократии, нашите демократски правила“, рече Макрон.
Тој посочи дека мора да има соработка меѓу земјите на транзит и земјите во кои одат мигрантите, за да се спречи протокот на илегална миграција и да се забрза враќањето на овие лица во нивните матични земји.
Макрон повтори дека е неопходно Европа да инвестира на сопствените пазари, а не да биде пазар кој е отворен за сите.
„Европа мора да постави свои правила, да има чиста енергија, вештачка интелигенција, мора да станеме конкурентни преку иновации и мислам дека е неопходно повторно да ги развиеме нашите внатрешни пазари“, рече тој.
