Поранешниот холандски премиер Марк Руте денеска ја презеде функцијата нов генерален секретар на НАТО, заменувајќи го Норвежанецот Јенс Столтенберг, кој раководеше со Алијансата една деценија.
Говорејќи на церемонијата на предавање, Руте рече дека како генерален секретар ќе работи на три приоритети. Првиот е силна НАТО Алијанса која ќе овозможи одбрана на сојузниците. Руте работи на тоа Алијансата да биде ефикасна и кредибилна против сите закани.
„Вториот приоритет е да ја засилиме нашата поддршка за Украина и да ја приближиме до НАТО, бидејќи не може да има трајна безбедност во Европа без силна, независна Украина“, рече тој.
Руте додаде дека трет приоритет за време на неговиот мандат ќе биде зајакнувањето на партнерствата на НАТО со ЕУ и земјите ширум светот кои споделуваат заеднички интереси и вредности.
Претходно, за време на средбата со Столтенберг, Руте рече дека нема да се промени основната мисија на НАТО да се осигура одбраната на луѓето, нациите и вредностите на земјите членки.
„Мораме да се погрижиме Украина да преовладува како суверена, независна, демократска нација“, рече тој, нагласувајќи дека НАТО треба да ја зголеми својата колективна одбрана.
И Столтенберг и Руте, исто така, изразија загриженост поради ескалацијата во Либан, изразувајќи надеж за мир во регионот.
Во јуни, НАТО објави дека Руте (47) ќе биде нов шеф на воената алијанса, заменувајќи го Јенс Столтенберг чиј мандат беше продолжен поради војната во Украина.
Тој беше единствениот кандидат откако романскиот претседател Клаус Јоханис се повлече од трката.
Сојузниците на НАТО во јули 2023 година се согласија да го продолжат мандатот на 65-годишниот Столтенберг за уште една година до 1 октомври 2024 година. Тој беше 13-ти генерален секретар на НАТО од 2014 година.
