Лидерот на германската Христијанско-демократска унија (ЦДУ) и најверојатно иден канцелар на Германија, Фридрих Мерц, денеска изјави дека сака да коалицира со Социјалдемократската партија (СПД) и дека во наредните денови ќе започне „конструктивни, добри и брзи“ преговори.
Тој на прес-конференција во Берлин рече дека има намера до Велигден да формира нова влада.
Мерц оцени дека миграцијата, економијата и одбраната се клучни теми за преговорите со СПД, пренесува Ројтерс.
„Ние Европејците мора брзо да бидеме способни да дејствуваме брзо, особено кога станува збор за одбраната“, рече тој, додавајќи дека прашањето за безбедноста „има апсолутен приоритет во наредните недели“.
Мерц изрази надеж дека ќе соработува со СПД по прашањето за миграцијата, а кога станува збор за економската состојба во земјата, се заложи за зачувување на индустриските работни места во Германија.
Реформата на уставните ограничувања за јавното задолжување во Германија ќе биде на дневен ред на преговорите меѓу демохристијаните и социјалдемократите за идната владина коалиција, изјави денеска германскиот канцелар во заминување Олаф Шолц.
„Многу работи треба да се разгледаат во овој контекст со најголема грижа, се разбира“, рече Шолц на конференцијата на неговата Социјалдемократска партија (СПД).
Според прелиминарните резултати од општите избори во Германија, кои се одржаа во неделата, најмногу гласови освоила коалицијата ЦДУ/ЦСУ - 28,5, Алтернативата за Германија освоила 20,8, а СПД 16,4 отсто од гласовите.
Зелените освоија 11,6 отсто од гласовите, а Левицата 8,8 отсто.
Коментирајќи го изборниот резултат на Алтернатива за Германија (AфД), Мерц рече дека тоа е „конечно предупредување“ до демократските партии да соработуваат.
Тој рече дека му рекол на израелскиот премиер Бенјамин Нетанјаху дека „ќе најде начин“ Нетанјаху да ја посети Германија без проблеми, имајќи предвид дека Меѓународниот кривичен суд (МКС) издаде налог за негово апсење.
Мерц рече дека разговарал со францускиот претседател Емануел Макрон за претстојната средба на Макрон со американскиот претседател Доналд Трамп.
„Се надевам дека ќе успееме да ги убедиме Американците дека е во наш заеднички интерес да имаме добри трансатлантски односи. Ние сè уште ги гледаме САД како партнер“, рече Мерц, изразувајќи загриженост за „она малку што го слушаме од Вашингтон во врска со војната во Украина“.
Тој истакна дека принципот „Америка на прво место“ на Трамп не мора да значи став „Америка сама“.
„Влошувањето на европско-американските односи нема да доведе само до влошување на ситуацијата во Европа, туку и во Америка“.
На прашањето за американско-руските преговори за ситуацијата во Украина, тој рече дека секој договор во кој Украина нема да учествува е неприфатлив ниту за Европа, ниту за Украина.
„Клучната порака мора да биде јасна: Европа е обединета“, рече Мерц, наведувајќи дека ситуацијата на континентот може да се опише како „пет минути до полноќ“.
На прашањето дали поранешната германска канцеларка Ангела Меркел му ја честитала изборната победа, тој рече дека честитките „сè уште не ги видел“.
