Либанското Министерство за здравство соопшти дека, според првичните информации, во денешните израелски напади врз Либан загинале најмалку 100 лица, а 400 се повредени.
Либанската новинска агенција ННА ја пренесе изјавата на Министерството за здравство за денешните израелски напади врз Либан.
Се наведува и дека меѓу загинатите и повредените има жени, деца и здравствени работници.
Либанскиот премиер Наџиб Микати изјави дека Израел планира да ги уништи либанските села и градови и да ги елиминира сите зелени површини со напади, пренесува Anadolu. Канцеларијата на либанскиот премиер објави соопштение за седницата на Советот на министри одржана во главниот град Бејрут. „Укажувајќи на загриженоста на генералниот секретар на Обединетите нации Антонио Гутереш дека југот на Либан може да стане „нова Газа“, либанскиот премиер во изјавата наведе дека решението за кризата треба да се бара преку спроведување на резолуцијата бр. 2735, кој предвидува прекин на огнот во Газа и реализација на решение со две држави за израелско-палестинското прашање“. Микати укажа и на сите засилени израелски напади врз Либан. „Овие напади на Израел се буквално геноцидна војна против Либан. Израел планира да ги уништи селата и градовите во Либан и да ги елиминира сите зелени површини со напади“, рече Микати. Либанскиот премиер изјави и дека на сите нивни средби ги повикувале Обединетите нации и релевантните земји да застанат зад она што е правилно и да ги запрат нападите.
Израелската армија денес започна интензивни воздушни напади врз Јужен Либан, што е најголемо бомбардирање од почетокот на непријателствата минатиот 8 октомври.
Израелската армија потврди дека денес извршила над 150 воздушни напади врз цели во Либан.
Портпаролот на Армијата, Даниел Хагари, рече дека израелската армија може да врши напади врз голем број либански села лоцирани до 80 километри од границата.
„Во последните часови ги откривме плановите на Хезболах за напади врз израелските граѓани. Во блиска иднина ќе ги напаѓаме непријателските цели во Либан за да ја елиминираме оваа закана“, додаде тој на прес-конференција.
Тензиите меѓу Хезболах и Израел се зголемија по смртоносниот воздушен напад во петокот во јужното предградие на Бејрут, во кој загинаа најмалку 45 лица, меѓу кои деца и жени, а десетици беа повредени.
Хезболах потврди дека најмалку 16 негови припадници, вклучително и високиот лидер Ибрахим Акил и главниот командант Ахмед Вахби, се убиени во израелскиот напад.
Нападот се случи два дена откако најмалку 37 лица загинаа, а над 3.000 беа повредени во два брана експлозии на уреди за безжична комуникација низ Либан.
