Откажани летови, доцнење по неколку часа и нередовни авиолинии беа главниот проблем на авиосообраќајот во Европа во текот на минатата 2022 година. Ова го покажа истражувањето на интернет сајтот „ЕрХелп“ (Airhelp), според кое цивилниот авиосообраќај во Европа минатата година бил многу нередовен, а авионите често доцнеле. Вкупно третина од патниците биле погодени од доцнења и откажувања на летовите, покажуваат резултатите од истражувањето.
И покрај намалениот распоред на летови, 244 милиони патници или нешто помалку од 31 отсто од вкупно 795 милиони превезени биле погодени од доцнења или откажувања во последен момент, се вели во анализата на интернет сајтот.
Пред коронавирусот
За споредба, во текот на 2019 година - последната година пред кризата со коронавирус, 24 отсто од патниците биле погодени од доцнења и откажувања, од нив вкупно 1,12 милијарди. Кога помина кризата со Ковид-19, превозниците се надеваа дека бројките ќе се вратат во нормала, но многу компании не беа подготвени.
„Особено летото покажа дека персоналот на аеродромите и превозниците не се подготвени за постпандемиското зголемување на воздушниот сообраќај“, рече шефот на „ЕрХелп“ Томаш Павлизин.
Според студијата, во текот на летните месеци до 40 отсто од патниците имале потешкотии со летовите. Покрај слабостите на персоналот, други главни причини за одложувањата беа штрајковите и неповолните временски услови. Павлизин предупредува дека не се на видик подобрувања ниту за 2023 година.
Штрајковите се огромен проблем
„Очекуваме продолжување на негативните трендови и во оваа година. Како и во многу други индустрии, недостатокот на квалификувана работна сила и понатаму е сериозен проблем, а дополнителни предизвици се штрајковите“, изјави тој.
