Генералниот секретар на НАТО Марк Руте денеска изјави дека Алијансата ќе го зајакне своето воено присуство во Балтичкото Море, откако Финска зароби танкер поврзан со Русија поради можноста дека се користел за саботажа.
Руте, во објава на мрежата Х, рече дека разговарал со финскиот претседател Александар Стуб и изразил солидарност со таа земја во тековната истрага за саботажа.
„НАТО ќе го зајакне своето воено присуство во Балтичкото Море“, рече Руте.
Финските власти во четвртокот задржаа брод поврзан со соседна Русија, кој сега се наоѓа во финските територијални води, додека истражуваат дали оштетил кабел за напојување во Балтичкото Море и неколку кабли за податоци.
Вооружените сили на Естонија започнаа поморска операција за заштита на подморскиот кабел за струја Естлинк 1 во Балтичкото Море, изјави во петокот министерот за надворешни работи Маргус Цахна.
„Доколку постои закана за критичната подморска инфраструктура во нашиот регион, ќе има и одговор“, напиша Цахна на социјалната мрежа Х.
