Американските власти објавија дека никој не го преживеал судирот на воен хеликоптер и патнички авион над реката Потомак, јави Си-Ен-Ен.
Според шефот на пожарникарската и итната служба на Вашингтон, Џон Донели, досега се извлечени 27 тела од патничкиот авион и едно од воениот хеликоптер.
„И покрај сите овие напори, сега преминуваме од спасувачки операции во операции за извлекување“, рече Донели, додавајќи:
„Во овој момент не веруваме дека има преживеани во оваа несреќа“.
Секретарот за транспорт, Шон Дафи, рече дека и авионот и хеликоптерот летале во стандардна шема на летот.
Несреќата се случила синоќа по американско време кога патнички авион на „Американ ерлајнс“ со 64 лица се судрил со воен хеликоптер „Блек Хок“ со тројца војници и се урнал во реката Потомак додека се обидувал да слета на националниот аеродром Роналд Реган во Вашингтон.
Како што претходно беше соопштено, нуркачки тим пронашол една од двете црни кутии од патнички авион.
Нуркачите имале пристап до кабината на авионот, а црната кутија е меѓу предметите што нуркачите ги пронашле.
При експлозијата авионот се распаднал на неколку делови.
Хеликоптерот е завртен наопаку, но се чини дека е главно без оштетувања.
