Израелскиот премиер, Бенјамин Нетанјаху, вчера го посети окупираниот Појас Газа.
На снимката што ја објави Канцеларијата за медиуми на израелскиот премиер се гледа средбата на Нетанјаху со израелските војници.
Обраќајќи им се на војниците, Нетанјаху рече дека Израел ќе продолжи сѐ до победата.
„Ќе продолжиме до крајот. До победата. Ништо не може да нѐ запре и сигурни сме дека имаме сила, волја и одлучност да ги постигнеме сите воени цели“, додаде Нетанјаху.
Нетанјаху во видео изјава објавена во неделата рече дека телефонски разговарал со американскиот претседател Џо Бајден и му рекол оти израелската влада ќе прифати продолжување на хуманитарната пауза во Газа во замена за ослободување на 10 заложници за секој дополнителен ден од паузата.
Четиридневната хуманитарна пауза со посредство на Катар, Египет и САД стапи на сила во петокот, привремено запирајќи ги нападите на Израел врз Појасот Газа.
Во првите два дена од паузата, Хамас и Израел разменија 41 Израелец и странци за 78 Палестинци во израелските затвори.
Според договорот, заложниците и затворениците ќе бидат ослободени во групи во текот на четири дена.
