Израелскиот премиер Бенјамин Нетанјаху изјави дека планот на американскиот претседател Доналд Трамп за САД да го преземат Појасот Газа може да ја „промени историјата“.
Трамп по средбата со Нетанјаху во Белата куќа рече дека Палестинците немаат алтернатива и оти мисли дека не треба да се враќаат во Газа.
Нетанјаху нагласи дека една од неговите цели во војната е да обезбеди Газа повеќе да не претставува закана за Израел, пишува „Тајмс оф Израел“.
Трамп, вели тој, има поинаква визија за регионот, кој беше „жариште на тероризам и напади врз Израел“.
Израелскиот премиер додаде дека е важно да се обрне внимание на плановите на Трамп и дека тие потенцијално ќе го променат текот на историјата.
Нетанјаху посочи и дека Хамас за време на сегашното „привремено примирје“ планира да изврши уште поголем напад од оној на 7 октомври.
Зборувајќи за мирот во регионот, Нетанјаху истакна дека мирот не може да се постигне ако Хамас, кој тој го нарече „токсичен и убиствен“, остане на власт.
Тој додаде дека таргетирањето на уништувањето на оние кои сакаат да го уништат Израел ќе биде клучно за постигнување мир во регионот, вклучувајќи го и мирот со Саудиска Арабија и другите држави.
На тема Иран, Нетанјаху ја поддржа изјавата на Трамп дека Иран не смее да има нуклеарно оружје, додавајќи дека доколку е можно тоа да се постигне преку кампања за „максимален притисок“, тоа треба да се направи.
Трамп рече дека решението за иранското прашање, доколку може да се постигне без војна, ќе биде „огромен успех“, но дека ќе остане да се види како ќе се развива ситуацијата.
По средбата меѓу Трамп и Нетанјаху во Вашингтон, министрите на израелската влада денеска изразија задоволство од пораките на Трамп во врска со Појасот Газа.
„Ова се случува кога двајца храбри лидери ќе се сретнат“, рече министерот за транспорт Мири Регев.
Министерот за енергетика Ели Коен рече дека ова е „историско утро за државата Израел, Блискиот Исток и светот“.
Претседателот на Кнесетот, Амир Охана, средбата меѓу двајцата лидери ја опиша како „зора на нов ден“.
„Имаме одличен премиер и неверојатен американски претседател! Фала му на Бога за ова чудо што го направи за израелскиот народ“, напиша израелскиот министер за култура и спорт Мики Зохар.
Министерот за финансии Безалел Смотрич рече: „Заедно ќе го направиме светот повторно голем“.
