Израелскиот премиер Бенјамин Нетанјаху им рекол на министрите во кабинетот дека, како што ја нарече, третата фаза од војната во Газа ќе трае шест месеци, објавија во вторникот локалните медиуми.
„Нетанјаху рече дека ќе бидат потребни шест месеци армијата да ја заврши третата фаза од војната, која веќе започна во северниот дел на Појасот Газа“, објави израелскиот јавен сервис КАН.
Израелскиот премиер изјави дека првата фаза од воздушното бомбардирање на Појасот Газа траела три недели.
„И како што рековме дека вториот дел ќе трае три месеци, така беше, така велиме дека третиот дел од воспоставувањето контрола ќе трае шест месеци“, рече тој, пренесе КАН.
Израел започна смртоносна офанзива на Појасот Газа по нападот на Хамас, при што загинаа најмалку 25.490 Палестинци, а беа ранети 63.354. Се верува дека околу 1.200 Израелци биле убиени во нападот на Хамас.
Според податоците на Обединетите нации, поради израелската офанзива, 85 отсто од населението во Газа е внатрешно раселено и се соочува со акутен недостиг на храна, чиста вода и лекови, додека 60 отсто од инфраструктурата на енклавата е оштетена или уништена.
