Нов шумски пожар вчера се прошири низ северниот дел на Округот Лос Анџелес, Соедддинетите Американски Држави (САД), зафаќајќи над 9.000 хектари за само неколку часа откако беше пријавен.
Пожарот Хјуз, кој брзо се шири, гори северно од малата заедница Кастејк, која се наоѓа северозападно од Лос Анџелес. Веќе се издадени наредби за евакуација во овој регион, поради што десетици илјади луѓе мора да ги напуштат своите домови, а соседните заедници се предупредени дека може да бидат принудени на евакуација.
Се проценува дека пожарот зафатил 50 хектари кога првпат е пријавен вчера во 10:53 часот по локално време, но брзо се прошири, зафаќајќи над 9.200 хектари до 20:27 часот синоќа, според податоците на „CalFire“, државна агенција за пожари во Калифорнија.
Пожарникарите се борат со огнената стихија што се прошири и во соседниот Округ Вентура.
Ова е најновиот пожар што го зафати поширокото подрачје на Лос Анџелес откако серија пожари почнаа да се шират низ вториот по големина град во САД на 7 јануари.
Првиот пожар, Палисејдс, го опустоши богатото крајбрежно место Пацифик Палисејдс, а пожарот Итон уништи големи делови од градот Алтадена.
Во пожарот Палисејдс загинаа вкупно 11 лица, а 17 лица го загубија животот во пожарот Итон.
Пожарите предизвикаа масовно разурнување, поради што илјадници жители мораа да бараат нови домови.
