Заменик-шефот на Мисијата за поддршка на ОН во Либија (УНСМИЛ), Стефани Кури, во вторникот издаде предупредување за „брзото“ влошување на ситуацијата во Либија во изминатите два месеци, велејќи дека „едностраните“ акции ги влошиле тензиите во земјата.
Кури го информираше Советот за безбедност на ОН за ситуацијата во Либија.
„Во текот на изминатите два месеци, ситуацијата во Либија се влоши доста брзо во однос на политичката, економската и безбедносната стабилност. Едностраните дејствија на либиските политички, воени и безбедносни актери ги зголемија тензиите, дополнително ги вкоренија институционалните и политичките поделби и ги комплицираа напорите за решение со преговори“, им рече Кури на членовите на Советот за безбедност.
Таа ги пофали напорите на либискиот народ да „продолжи напред“ и рече дека има „оживеан ангажман на политички партии, синдикати, граѓанско општество, независни личности и други страни за координирање и проактивно унапредување на конструктивни идеи за обликување на политичкиот процес“.
Таа, исто така, ги истакна напорите на УНСМИЛ да помогне во развојот на мерките за градење доверба за да се спречат едностраните дејства и да се создаде погодна средина за продолжување на политичкиот процес.
Нагласувајќи ја фрустрацијата на Либијците од статус кво состојбата, изразувајќи страв од војна и судири, Кури рече: „Младите не гледаат иднина освен да се обидат да заминат. Ова е неприфатливо“, нагласи таа.
Либискиот амбасадор во ОН Тахер ал-Суни го критикуваше Советот за безбедност на ОН поради недостигот од практични решенија и праша: „Кој меѓу нас е одговорен за заштита на меѓународниот мир и безбедност?
Нагласувајќи ја потребата од слободни, транспарентни и инклузивни избори, како и воспоставување на патоказ за политичкиот процес, либискиот претставник рече: „Меѓународната заедница никогаш не дозволи либискиот народ да ги преземе уздите на процесот што всушност ќе одреди нивната судбина“.
Тој ја изрази решеноста на Либија да се „исчисти“ од странско мешање, велејќи: „Либискиот народ сака да биде господар на сопствената судбина и одбива секакво странско мешање во либиските работи“.
