Папата Франциск денеска во божиќното обраќање повика на прекин на војните во Газа и Украина и изрази надеж дека мирот ќе се постигне со дијалог.
Во своето обраќање до „Urbi et Orbi“ (градот и светот) од централниот балкон на базиликата Свети Петар во Рим, тој на верниците собрани на истоимениот плоштад им порача дека „сега е потребна храброст да се отвори вратата за преговори со цел да се стави крај на војната во Украина“.
„Нека се замолчи звукот на оружјето во разурната Украина!“ рече Папата и повика на „гестови на дијалог и средба, за да се постигне праведен и траен мир“.
Папата Франциск, кој претходно ја критикуваше израелската воена кампања во Газа како „сурова“, исто така го повтори својот повик за прекин на огнот во палестинската енклава и ослободување на заложниците.
Тој ја окарактеризира хуманитарната ситуација во Газа како „исклучително тешка“ и побара „да се отвори вратата за дијалог и мир“.
Илјадници верници го слушаа обраќањето на папата додека чекаа да поминат низ светата врата на базиликата Свети Петар, што е еден од начините на кои можат да добијат простување на гревовите во тековната Света година.
Папата Франциск синоќа свечено ја отвори Светата врата во базиликата Свети Петар во Рим и прв помина низ неа, со што го означи почетокот на јубилејот или Светата 2025 година, која е посветена на надежта.
Јубилејот, познат и како Света година, во католичката традиција е време посветено на промовирање на светоста на животот, зајакнување на верата, поттикнување на солидарноста и братското единство и „поканување и охрабрување на верниците на поискрен и покохерентен интерес за верата во Христос Спасителот“.
