Најмалку пет лица загинаа, четворица пожарникари се повредени, а повеќе од илјада домови се уништени во разорните пожари поттикнати од силните ветрови што ја пустошат областа во Лос Анџелес.
Во моментов во пошироката област на Лос Анџелес беснеат неколку шумски пожари. Најголемиот од нив, во населбата Палисади, уништи повеќе од 17.000 хектари од четвртокот наутро, според Калифорниското одделение за шумарство и заштита од пожари.
Во градот е прогласена вонредна состојба, а повеќе од 130.000 луѓе или се евакуирани или им е наредено да се подготват за тоа.
Покрај илјада куќи што изгореа, изгореа исто толку и нестанбени објекти. Официјални лица велат дека повеќе од 37.000 имоти во регионот се загрозени од пламените јазици.
Гаснењето на пожарот на тешко пристапниот терен е отежнато од ветровите што дуваат со брзина на урагани.
Без своите домови останаа и некои познати личности.
Актерот Били Кристал и милионерката Парис Хилтон јавно објавија дека нивните домови изгореле.
Џејми Ли Кертис, Џејмс Вудс, Марк Хамил и Марија Шрајвер се други познати личности кои беа принудени да ги напуштат своите домови.
Шрајвер, новинарка и поранешна прва дама на Калифорнија додека беше во брак со тогашниот гувернер Арнолд Шварценегер, го опиша разорниот размер на уништувањето.
„Нашето маало го нема целосно“, напиша таа на X во средата. „Пожарникарите даваат и даваат сѐ од себе, но овој пожар е огромен и надвор од контрола.
Вудс, двапати номиниран за Оскар и трикратен добитник на Еми, раскажа како побегнал од својот дом во Пацифик Палисади додека пламените јазици гореле „како пекол“.
„Еден ден пливате во базенот, а следниот ден сето тоа го нема“, рече тој.
Во средата вечерта избувна уште еден пожар во познатата населба Холивуд Хилс и делови од населбата мораа да бидат евакуирани.
Ова ги приближи пожарите до центарот на градот. Противпожарните авиони и хеликоптери сѐ во постојана употреба за да се спречи ширењето на пламенот во густо населената холивудска населба.
Жителите шокирани од обемот на пожарот
Бајден го прогласи опустошениот регион за пегион на катастрофа. Акцијата на претседателот ги става на располагање федералните средства за погодените од пожарите.
Бајден поради шумските пожари го откажа планираното патување во Италија и средбата со папата Франциск.
Според американските медиуми, шумските пожари се едни од најлошите во историјата на Лос Анџелес.
Видео снимките од областа на катастрофата покажуваат густ чад што се извива над градот, при што многу жители носат маски.
Сите училишта се затворени, а настаните се откажани бидејќи пожарите продолжуваат да предизвикуваат хаос, домовите претворени во урнатини, а дрвјата јагленисани.
Во областите каде што сè уште беснеат пожарите, огромните пламени достигнуваат висина од неколку метри, осветлувајќи го небото.
Зафатен е и холивудскиот бизнис, церемониите за доделување награди на критичарите се одложени, а филмските премиери се откажани. Академијата за филмски уметности и науки го одложи објавувањето на номинираните за Оскар.
