Пет здравствени работници загинаа во израелски воздушни напади врз градот Дергаја во јужен Либан, соопштија денеска властите.
Со ова вкупниот број на загинати здравствени работници се искачи на 115 од почетокот на израелската операција во Либан минатиот месец.
Силите за цивилна одбрана на Либан соопштија дека здравствените работници чекале во импровизираниот центар за итни случаи во црквата во јужниот град Дергаја кога се случил нападот и дека службите во моментов работат на расчистување на урнатините.
Во текот на ноќта, два воздушни напади беа забележани и во предградието на Бејрут, Дахија, кое е под контрола на Хезболах, додека Израел тврди дека цел бил „терористичка инфраструктура“.
Израел утринава објави дека убила двајца воени команданти на Хезболах кои биле едни од организаторите на ракетниот напад врз северен Израел.
Хезболах се уште не ја коментирал смртта на неговите команданти.
