Терористичката организација ПКК/ЈПГ регрутираше речиси 300 терористи од Германија кои отпатувале во Сирија и Ирак за да се борат за организацијата, соопштија германските власти.
Владата го објави податокот како одговор на прашањето од пратеник на опозициската партија Алтернатива за Германија (АфД).
„Од 2013 година, германските разузнавачки служби идентификуваа речиси 300 луѓе кои отпатувале во северна Сирија и Ирак каде што се приклучиле на терористичката организација ПКК и придружните групи“, соопшти Владата.
„Не беше можно да се утврди дали овие воени волонтери навистина се бореле против терористичката организација ДЕАШ или учествувале во други конфликти“, истакнаа од Владата.
„Речиси 150 од странските борци се вратиле во Германија“, потврди Владата, но не даде поконкретни информации за истрагите или судските постапки започнати против нив.
ПКК е класифицирана како „етнонационалистичка“ и „сепаратистичка“ терористичка организација од Агенцијата на Европската Унија за спроведување на законот, ЕВРОПОЛ, и е забранета во Германија од 1993 година.
Но таа останува активна во земјата, со речиси 14.500 следбеници меѓу курдското имигрантско население во земјата.
Германската домашна разузнавачка агенција БфВ во својот годишен извештај предупреди дека ПКК останува најголемата странска екстремистичка организација во земјата, а нејзините следбеници можат да извршат насилни напади доколку добијат инструкции од водачите на организацијата во странство.
Туркије долго време го повикуваше својот сојузник во НАТО, Германија, да преземе посилна акција против ПКК и нејзиниот сириски огранок ЈПГ, нагласувајќи дека овие терористички организации ја користат Германија како платформа за нивните активности за собирање средства, пропаганда и регрутирање.
Во својата над 35-годишна терористичка кампања против Туркије, ПКК е одговорна за смртта на околу 40.000 луѓе.
