Неодамнешното истражување покажа дека 64 отсто од Американците се противат на предлогот на претседателот Доналд Трамп, САД да го „преземат и да го поседуваат“ Појасот Газа и да го трансформираат во, како што тој ја опиша „ривиера на Блискиот Исток“.
Значителен дел од анкетираните изразија силно противење на овој план.
Имено, 47 отсто се изјасниле дека „остро“ се против планот, а 17 отсто се изјасниле дека „донекаде“ се против, покажува истражувањето спроведено од прогресивната тинк-тенк Податоци за напредок (Data for Progress).
Меѓу демократските гласачи, 85 отсто се спротивставија на идејата, додека 43 отсто од републиканците беа против. Во меѓувреме, 46 отсто од републиканските испитаници го поддржаа предлогот.
Анкетата, во која беа анкетирани 1.200 испитаници ширум САД, истакна дека таков план ќе вклучи „присилно преместување“ на околу 1,8 милиони Палестинци кои моментално живеат во Газа во соседните земји.
„Огромното мнозинство од испитаниците се против преземањето на контролата врз Газа од страна на САД и раселувањето на палестинското население“, велат од тинк-тенкот.
Предлогот на Трамп за присилно раселување на Палестинците, кој беше широко отфрлен од Палестинците и поширокиот арапски и муслимански свет, доаѓа во време на кревкиот договор за прекин на огнот, кој стапи во сила во Газа на 19 јануари, паузирајќи ја 15-месечната офанзива на Израел во која загинаа повеќе од 48.200 луѓе.
Израел со години ја одржува блокадата на Газа, претворајќи ја во најголемиот затвор на отворено.
Речиси 2 милиони од нејзините 2,3 милиони жители се насилно раселени од почетокот на војната по нападот на палестинската група Хамас на 7 октомври 2023 година, бидејќи се соочија со сериозен недостиг на храна, вода и лекови.
