Рускиот претседател Владимир Путин изјави во четвртокот дека Евроазиската економска унија (ЕАЕУ) и Иран планираат да потпишат договор за создавање зона за слободна трговија до крајот на годината.
„Ова ќе создаде дополнителни можности за проширување на нашата интеракција“, рече Путин за време на средбата со неговиот ирански колега, Ебрахим Раиси во Москва.
Путин му ја пренесе на Раиси потребата да се разговара за актуелната ситуација во Палестина и рече дека е многу важно Москва и Техеран да разменат мислења за ситуацијата во регионот.
Путин се осврна и на билатералните врски, велејќи дека соработката меѓу Русија и Иран се развива во различни области.
„Имаме големи инфраструктурни проекти. Долго време разговаравме за нив, а сега преминавме на практично спроведување на изградбата на пругата Север-Југ. Работиме, се подразбира, традиционално на полето на енергетиката“, рече тој.
Трговскиот промет меѓу Москва и Техеран достигна речиси 5 милијарди долари и порасна за 20 отсто само во 2022 година, рече Путин.
Раиси рече дека човештвото страда од унилатерализам и неправеден глобален систем, а негова манифестација е Појасот Газа.
Опишувајќи го она што се случува на опколената палестинска територија како „геноцид“ и „злосторство против човештвото“, Раиси укажа на големиот број на жртви во Газа од 7 октомври, особено на децата, и рече дека меѓународните организации ги „изгубиле сите свои механизми“.
Повторувајќи го она што тој постојано го кажува во последните неколку недели, Раиси рече дека израелските злосторства во Газа „се поддржани од Америка и другите западни земји“, оценувајќи ја „неефективноста“ на меѓународните организации како „несреќна“.
„Газа е земја во која на секои 10 минути загинува дете, па затоа е неопходно да се прекинат овие бомбардирања што е можно поскоро“, рече тој.
Осврнувајќи се на односите меѓу Русија и Иран, Раиси рече дека Русија и Иран имаат добра соработка во енергетиката, земјоделството и индустриите засновани на знаење и повика на зајакнување на соработката и рече дека нивните земји можат понатаму да се развиваат во согласност со иранската „соседска политика“.
Тој, исто така, упатил покана до Путин да го посети Техеран, што рускиот претседател ја прифатил, јавуваат иранските државни медиуми.
