Рускиот претседател Владимир Путин во вторникот положи заклетва за нов шестгодишен претседателски мандат на церемонија бојкотирана од САД и многу членки на Европската унија поради војната во Украина.
Во својот говор на церемонијата, Путин им порача на Русите дека заедно ќе „победат“ и ќе излезат уште „посилни“ од „овој тежок период“ среде војната во Украина.
„Ние сме една голема и обединета нација и заедно ќе ги надминеме сите пречки (...) Заедно ќе победиме“, рече Путин пред околу 2.500 луѓе, вклучително и политичката елита и борците кои учествуваат на боиштето во Украина.
„Достоинствено ќе го поминеме овој тежок период и ќе станеме уште посилни“, рече Путин и додаде дека „со самодоверба гледа напред“.
Тој исто така рече дека Русија сама ќе одлучува за својата судбина.
„За судбината на Русија сами ќе одлучуваме, исклучиво сами, за подобрување на сегашните и идните генерации“, рече Путин во говорот што го пренесуваат сите државни телевизиски канали.
Рускиот претседател го оцени разговорот со Западот за прашањата за безбедноста и стратешката стабилност како можен, но само на рамноправна основа, почитувајќи ги заемните интереси.
Повторно ја нарече „света“ задачата да ја води земјата со повеќе од 140 милиони жители.
„Тоа е голема чест, одговорност и света задача“, рече Путин во говорот под позлатените куполи на салата Андреевски во Кремљ пред да оди во една од катедралите во близина на огромната палата.
Путин убедливо победи на претседателските избори во март.
Дел од западните влади не сметаат дека изборите се вистински израз на демократската волја на руските гласачи бидејќи немало вистинска алтернатива за Путин.
Кремљ ги отфрла овие обвинувања и тврди дека Путин навистина има огромна поддршка од рускиот народ.
Путин, кој е на власт како претседател или премиер од 1999 година, го започнува новиот мандат повеќе од две години откако испрати десетици илјади војници во Украина, каде што руските сили ја вратија иницијативата по серија пресврти и се обидуваат да напредуваат понатаму.
На 71 година, Путин доминира во домашната политичка сцена. На меѓународната сцена тој е во судир со западните земји кои ги обвинува дека ја користат Украина како алатка за распарчување на Русија.
Портпаролот на Кремљ, Дмитриј Песков, изјави дека Путин во вторник би можел да назначи премиер кој ќе ја води Владата.
Според рускиот устав, Владата мора да поднесе оставка на почетокот на новиот претседателски мандат, по што тој ќе назначи нов премиер.
Актуелен премиер е Михаил Мишустин, а Путин би можел повторно да го номинира.
