Радикалните еврејски групи планираат марш до џамијата Ал Акса во окупираниот Источен Ерусалим (Источен Кудс) за да „стават крај на нејзиниот исламски статус“ и да ја „јудаизираат“.
Разни екстремно десничарски еврејски групи во заедничка изјава објавија дека провокативниот марш ќе го одржат вечерва, што се совпаѓа со првиот ден на Ханука, еврејски празник што трае осум дена.
Во соопштението се вели дека маршот, кој е одобрен од израелската полиција, ќе биде организиран со цел „да се стави крај на управувањето на Ерусалимскиот исламски вакаф со Месџид ал Акса“, кој е одговорен за управата на светото место на муслиманите, и „повторно воспоставување целосен еврејски суверенитет“ во Ерусалим и над џамијата Ал Акса.
Маршот ќе продолжи кон џамијата Ал Акса од портата Дамаск, една од главните порти на Стариот град на Ерусалим.
Лоциран во Стариот град на окупираниот Источен Ерусалим, џамијата Ал Акса е под покровителство на Ерусалимскиот исламски вакаф, поврзан со јорданското Министерство за вакаф, според Израелско-јорданскиот мировен договор потпишан на 26 октомври 1994 година.
Но радикалните Евреи вршат упади во џамијата Ал Акса во придружба на полицијата од 2003 година, со еднострана одлука на Израел и иницијативи на одредени екстремно десничарски организации.
Радикалните Евреи, кои областа ја нарекуваат Планината на храмот, ги охрабруваат Израелците да вршат упади во Ал Акса и да спроведуваат религиозни ритуали, придружени со повици за изградба на еврејски храм таму.
Вакафот предупреди дека упадите на радикалните Евреи се зголемени во последните години.
Израелските сили воведоа ограничувања за влез на муслиманите во џамијата Ал Акса од 7 октомври, кога започнаа нападите врз Појасот Газа, и ги спречуваат Палестинците, освен постарите лица, да влезат во џамијата за време на петочната молитва.
