Радмила Шекеринска, поранешен министер за одбрана на Република Северна Македонија, е избрана за заменик генерален секретар на НАТО. Веста за изборот ја соопшти Марк Руте, генералниот секретар на НАТО.
„Среќен сум што можам да го објавам именувањето на Радмила Шекеринска за следен заменик генерален секретар. Таа е вистински верник во НАТО, ја знае работата што е потребна за да се приклучи на Алијансата и што значи да се биде полноправна членка“, посочи Руте.
Тој додаде дека со нетрпение очекува да работи со неа додека ја преземе оваа витална улога, се наведува во официјалната објава.
Шекеринска претходно беше вицепремиер за европски интеграции и министер за одбрана на Северна Македонија, вклучително и пред влезот на земјата во НАТО Алијансата во 2020 година.
Шекеринска ќе ја преземе својата функција подоцна оваа година.
