Романското државно обвинителство денеска го сослуша кандидатот на екстремната десница Калин Ѓорѓеску како дел од пошироката истрага за нерегуларности на претседателските избори кои беа поништени во декември 2024 година поради сомневање за руско мешање во изборниот процес.
Обвинителите покренаа кривична истрага за наводни нерегуларности, вклучително и финансирање кампања, промовирање антисемитизам и говор на омраза, како и дела против уставниот поредок, пишува Ројтерс.
Ѓорѓеску во моментов не се смета за осомничен, соопшти обвинителството, истакнувајќи дека полицијата денеска извршила 47 претреси на блиски соработници и здруженија поврзани со Ѓорѓеску.
Претходно овој месец, полицијата упадна во домот на неговиот менаџер на кампањата.
Ѓорѓеску ги обвини властите за однесување кое потсетува на „комунистичкото минато на Романија“.
„Комунистичкиот болшевички систем продолжува со својата грозоморна злоупотреба. Тие измислуваат докази за да ја оправдаат кражбата на изборите и би направиле се во обид да ја блокираат мојата нова кандидатура“, рече Ѓорѓеску на Фејсбук.
Неговиот тим за комуникација го соопшти тоа во објава на социјалните мрежи
Властите денеска го одведоа Ѓорѓеску на сослушување додека тој требаше да ја поднесе својата кандидатура за повторените претседателски избори закажани за мај.
„Калин Ѓорѓеску имаше намера да ја поднесе својата нова кандидатура за претседател. Системот го запре сообраќајот на 30 минути и тој беше одвлечен во Јавното обвинителство на сослушување! Каде е демократијата, каде се партнерите кои мора да ја бранат демократијата“, пишува во пораката што ја објави неговиот прес-тим.
Ѓорѓеску, кој ги пофали романските фашистички водачи од 1930-те и изрази восхит за американскиот претседател Доналд Трамп и рускиот претседател Владимир Путин, останува водечки во анкетите пред изборите во мај, иако не е јасно дали ќе му биде дозволено да се кандидира.
Претставниците на администрацијата на Трамп остро ја критикуваа Романија за поништување на изборите.
