Руското Министерство за одбрана објави слики на кои се прикажани остатоци од ракетите АТАКМС од американско производство што ги користи Украина за да напаѓа цели во руската област Курск.
Во соопштението се потврди дека истрагите на локациите утврдиле употреба на тактички ракети од американско производство и се вели дека Москва се подготвува да одговори на нападите од Украина.
„Според потврдените податоци, во текот на изминатите три дена, вооружените сили на Украина извршија два удари со западно оружје со долг дострел врз цели во областа Курск. Министерството за одбрана на Руската Федерација ја следи ситуацијата и подготвува одмазднички дејствија“, се вели во соопштението.
Министерството додаде дека Киев лансираше пет тактички проектили АТАКМС од американско производство на 23 ноември, коишто цели на противвоздушен одбранбен систем С-400 во близина на селото Лотаревка, 37 километри северозападно од Курск.
Седум проектили беа пресретнати од системите за противвоздушна одбрана С-400 и Панцир, додека еден стигна до целта. Двајца војници се здобиле со полесни повреди, а инфраструктурните објекти претрпеле мала штета како резултат на падот на фрагменти од проектил, се додава во соопштението.
Американскиот претседател Џо Бајден го овласти Киев минатата недела да изврши напади длабоко во руската територија користејќи АТАКМС, за кои се потребни американски воени специјалисти.
Украина потоа изврши повеќекратни напади на руска територија со оружје испорачано од НАТО. Како одмазда, Русија ја лансираше својата најнова хиперсонична ракета, Орешник, за цел на воената постројка Јужмаш во украинскиот град Днипро.
