Повеќе од 20 лица се приведени во рамките на истрагата поврзана со терористичкиот напад во концертната сала „Крокус“ во Москва, изјави директорот на руската Федерална служба за безбедност (ФСБ) Александар Бортников.
Говорејќи на состанокот на Советот на началниците на безбедносните и разузнавачките служби на Заедницата на независни држави (ЗНД) што се одржа во Бишкек, главниот град на Киргистан, Бортников се осврна на терористичкиот напад извршен од вооружени лица вечерта на 22 март во концертна сала во Москва, главниот град на Русија.
„Истрагата продолжува, но веќе може да се каже дека украинската воена разузнавачка служба е директно поврзана со овој напад“, тврди Бортников.
Наведувајќи дека продолжуваат да ги идентификуваат инволвираните во нападот, Бортников додаде:
„Фатени се повеќе од 20 лица, вклучително и извршителите на нападот и нивните соучесници. Ќе се утврдат сите детали за извршеното злосторство, како и кој бил вклучен во нападот“.
Терористичкиот напад го извршија вооружени лица во концертната сала „Крокус“ во Москва на 22 март. Напаѓачите отворија оган по случаен избор во фоајето со автоматско оружје. Во терористичкиот напад животот го загубија 144 лица.
