Припадниците на Њујоршката полиција (NYPD) влегоа во зградата на Универзитетот Колумбија, окупирана од пропалестински демонстранти доцна во вторникот, а американските медиуми објавија дека се приведени десетици луѓе.
Полицијата влезе во култната академска зграда на Хамилтон Хол преку прозорец користејќи скала за пристап до објектот.
На телевизиските снимки што ги објави Си-Ен-Ен се гледа како десетици полицајци влегуваат во зградата.
Снимките покажаа дека најмалку еден полициски автобус со приведени пропалестински демонстранти го напушта универзитетскиот кампус, а полициската акција продолжи.
Зградата била исчистена од демонстрантите околу 23 часот по локално време, два часа по почетокот на операцијата, а според медиумите биле приведени повеќе од 100 лица.
Демонстрантите рано во вторникот влегоа во салата Хамилтон, која ја преименуваа во „Хиндс сала“ во спомен на шестгодишното девојче Хинд Раџаб, кое беше брутално убиено во Газа, и рекоа дека нема да ја напуштат зградата додека не се исполнат нивните барања.
Тие и друга група што постави камп на тревникот на кампусот бараат Универзитетот Колумбија да се отпушти од израелските компании и да ја осуди израелската војна на Појасот Газа. Претседателот на универзитетот, Минуш Шафик, рече дека нема да го стори тоа.
Од април, Универзитетот Колумбија е во фокусот на студентските протести кои се проширија на десетици универзитети и колеџи низ САД, изразувајќи противење на израелската војна во Газа.
Претставници на Универзитетот Колумбија претходно во вторникот се заканија дека академски ќе ги избркаат студентите кои ја окупираа Хамилтон Хол. Универзитетот соопшти дека почнал да ги суспендира студентите кои го отфрлија рокот да го напуштат протестниот камп, откако не успеаја неколкудневните разговори со водачите на протестите, чија цел беше демонтирање на шаторите.
