Шпанскиот премиер Педро Санчез изјави дека Европската Унија (ЕУ) треба да ги преиспита односите со Израел доколку се утврди дека земјата го прекршува меѓународното право и обврзувачките резолуции на Обединетите нации (ОН).
Говорејќи за Ал Џезира тој рече дека постојат јасни сомневања дали Тел Авив ги прекршува тие закони и резолуции.
Во ЕУ, Ирска и Шпанија побараа оценка за ова прашање, а откако ќе се подготви се надеваат на сериозна дебата во Комисијата на ЕУ.
Во текот на интервјуто Санчез беше многу критичен кон „страшната војна во Газа“ и стратегијата на премиерот Бенјамин Нетанјаху да постигне безбедност преку војна, а не со дипломатија.
„На почетокот сите чувствувавме дека солидарноста со земјата беше нападната... но овој неурамнотежен одговор и ужасната ситуација во Газа... го става Нетанјаху во тешка и изолирана ситуација на меѓународно ниво“, рече тој.
Тој истакна дека Шпанија со месеци отворено зборува за потребата од прекин на огнот и признавање на државата Палестина, а сѐ поголем број земји од ЕУ почнуваат да го прифаќаат овој став.
„Меѓународната заедница како целина мора да го признае полноправното членство на Палестина во ОН во системот на ОН и билатерално“, рече тој. „Овој момент треба да се разликува од другите на кои бевме сведоци во изминатите седум децении.“
Санчез го осуди неодамнешниот напад на Израел врз хуманитарните работници на Светската централна кујна, нарекувајќи го „неприфатлив“ и рече дека условите за хуманитарните работници во Газа се „исклучително опасни“.
Тој го осуди неодамнешното израелско бомбардирање на иранскиот конзулат во Дамаск како „неприфатливо“ и нешто што треба да се разјасни. „Треба да избегнеме ескалација на конфликтот во регионот“, рече тој.
Шпанскиот премиер, исто така, се согласи со изјавата на највисокиот дипломат на ЕУ, Жозеп Борел, дека земјите засегнати со бројот на загинати во Газа, која надмина 33.000, треба да му „обезбедат помалку оружје“ на Израел, нагласувајќи дека Шпанија престана да продава оружје од почетокот на војната.
Тој рече дека и покрај израелското противење за дводржавно решение, меѓународната заедница мора да се обедини за да ги признае двете држави како независни. Санчез, исто така, го сподели своето мислење дека контролата над Газа, Западниот Брег и Источен Ерусалим треба да им се даде на овластените палестински власти.
Санчез беше во Доха како дел од втората блискоисточна турнеја по избувнувањето на војната и ги посети лидерите на Јордан, Саудиска Арабија и Катар за да разговараат за начините за враќање на мирот во регионот.
„Шпанија промовира меѓународна мировна конференција што ќе го зацврсти решението за две држави, план што го поддржаа земјите од ЕУ, Арапската лига и Организацијата за исламска соработка“, рече премиерот.
