Германија се уште се соочува со тешка битка против екстремистите и популистите, предупреди во четвртокот канцеларот Олаф Шолц.
„Не само во Источна Германија доживуваме државни избори на кои понекогаш до една третина од гласачите избираат авторитарна и национално-радикална политика“, рече Шолц на церемонијата за германско единство во источниот град Шверин.
Кога станува збор за популисти кои се борат против либералната демократија, тоа е нарушувачко и штетно за целата земја, економијата и нејзиниот углед во светот, додаде тој.
Канцеларот предупреди дека „се уште ќе треба многу напорна работа за да се смени овој развој“.
Германската влада смета дека екстремно десничарскиот екстремизам е најголемата закана за демократијата во земјата.
„Десничарскиот екстремизам останува постојан предизвик бидејќи е најголемата екстремистичка закана за основниот демократски поредок“, според министерката за внатрешни работи Ненси Фезер.
Минатиот месец, германската екстремно десничарска партија Алтернатива за Германија (АфД) прослави „историски успех“ со голема победа во источната покраина Тирингија.
Резултатот ѝ дава прва победа на екстремната десница на изборите за државниот парламент по Втората светска војна, иако таа нема речиси никакви шанси да формира влада во Тирингија, бидејќи другите партии веројатно нема да соработуваат со неа.
Во меѓувреме, АфД беше втора во соседната покраина Саксонија. Канцеларот Олаф Шолц ги нарече изборните резултати „горчливи“ и ги повика другите мејнстрим партии да формираат државни влади без екстремната десница.
„АфД и штети на Германија. Ја ослабува економијата, го дели општеството и го уништува угледот на нашата земја“, според него.
