Германскиот канцелар Олаф Шолц денеска изрази отвореност за дискусија за датум за нови избори со опозицијата. Говорејќи на прес-конференција во Будимпешта, Шолц рече дека предложил одржување предвремени избори во март по падот на неговата коалициска влада, но и дека претходно треба да се усвојат важни закони.
„Треба да разговараме за датумот што е можно помирно. Добро би било сега во парламентот да се постигне договор меѓу демократските партиски групи за тоа кои закони може да се носат годинава“, рече тој.
Шолц додаде дека таков договор тогаш би можел да одговори и на прашањето кога е вистинското време да се повика на гласање за доверба во Бундестагот и да се одреди датумот за избори.
Канцеларот истакна дека одредувањето датум за избори не е само политичка одлука и мора да се обезбеди соодветно време за организирање фер и демократски изборен процес.
Главната германска опозиција, Демохристијаните, инсистираа на тоа дека канцеларот Шолц треба да повика на гласање за доверба следната недела, предлагајќи предвремени избори да се одржат најдоцна до јануари 2025 година.
Фридрих Мерц, лидерот на Христијанско-демократската унија (ЦДУ), предложи изборите да се одржат на 19 јануари, еден ден пред новоизбраниот американски претседател Доналд Трамп да ја преземе функцијата.
„Во Германија, би било сосема можно да се одржат федерални избори на таков ден. Тоа би било моја препорака“, изјави тој за германскиот неделник „Стерн“.
