Германскиот канцелар Олаф Шолц ветил континуирана воена поддршка за Украина за време на телефонскиот разговор со украинскиот претседател Володимир Зеленски, изјави денеска портпаролот на владата на Германија Штефен Хебестрајт.
„Канцеларот ја потврди непоколебливата солидарност на Германија со Украина во лицето на континуираната агресија на Русија. Тој увери дека Германија ќе продолжи да ја поддржува Украина во воената област, во тесна координација со европските и меѓународните партнери. Претседателот Зеленски го информираше за ефектите од неодамнешните руски напади и ѝ се заблагодари на германската влада за нејзината воена поддршка, особено за зајакнувањето на капацитетите за воздушна одбрана на Украина“, изјави Хебестрајт.
За време на телефонскиот разговор, Шолц и Зеленски се согласиле да останат во близок контакт и да продолжат со нивната конструктивна размена за развојот на настаните, вклучително и меѓународните напори за мирно решение на конфликтот, рече портпаролот.
Планирано е Шолц утре во Берлин да биде домаќин на францускиот претседател Емануел Макрон и полскиот премиер Доналд Туск, за да разговараат за најновите случувања во Украина и начините за зголемување на поддршката за украинската војска.
Состанокот доаѓа во време на растечка загриженост во Европа за одржливоста на американската воена поддршка за Украина, поради изборната година и веројатноста за втор мандат на поранешниот претседател Доналд Трамп во Белата куќа.
Во последните недели, Зеленски апелираше до европските сојузници за поголема поддршка и предупреди дека украинската армија се соочува со критичен недостиг на муниција, особено артилериски гранати.
Германија во моментов е вториот најголем снабдувач на оружје за Украина по САД. Досега додели или вети 28 милијарди евра (30,5 милијарди долари) воена помош за Украина и испорача напредни системи за оружје, вклучително и водени ракети воздух-воздух ИРИС-Т и ракетни системи за противвоздушна одбрана Патриот.
