Парламентарното собрание на Советот на Европа, со седиште во северниот француски град Стразбур, денес усвои резолуција со која се бара итен прекин на хуманитарната криза од која се погодени палестинските деца и жени, како и заложниците во Појасот Газа.
Резолуцијата беше усвоена со 90 гласа „за“, 18 „против“ и 14 воздржани.
Во неа се истакнува дека нападите на Израел врз Газа предизвикале незамислива хуманитарна криза во текот на изминатата година, загинаа многу голем број луѓе, меѓу кои и здравствени и хуманитарни работници.
Во Резолуцијата се нагласува потребата за заштита на цивилите и обезбедување на основните животни потреби, повикувајќи на отворање повеќе пристапни патишта за да стигне хуманитарната помош до регионот.
Исто така, се истакнува важноста да продолжи со работа Агенцијата на ОН за палестинските бегалци и се повикува на ослободување на затворениците.
Во обраќањето на седницата ирската делегатка Фиона О’Лафлин истакна дека речиси секој ден 10 деца во Газа губат екстремитети и дека 20.000 деца останале сираци.
Таа нагласи дека над 96 отсто од жените и децата во Газа не можат да ги задоволат основните потреби за храна, повикувајќи на зголемување на хуманитарната помош за регионот.
Португалската делегатка Едите Естрела истакна дека Палестинците имаат потреба од мир за да ги обноват своите животи и домови, изразувајќи поддршка за правата на палестинските жени и деца.
Естрела, исто така, ги осуди континуираното насилство и уништување, посочувајќи на значителните цивилни загуби предизвикани од постојаните бомбардирања и напади.
По нападите на палестинската група Хамас, од 7 октомври 2023 година досега Израел уби повеќе од 47.000 лица, главно жени и деца, во Газа.
Поради постојаното бомбардирање се расели поголем дел од населението во Газа, има недостиг на храна и други основни потреби, а поголем дел од енклавата е во урнатини.
Примирјето е на сила од 19 јануари.
