Тужбите против американската Влада поради нејзината поддршка за неодамнешниот геноцид во Газа и вмешаноста во кршењето на човековите права во време додека претседател беше Џо Бајден продолжуваат и кон новата администрација.
И покрај извештаите на официјални лица од американскиот Стејт департмент, кои документирaат кршење на човековите права и акти на геноцид од страна на Израел во Газа, администрацијата на Бајден ги игнорираше овие докази, а тоа доведе до започнување правни постапки против поранешната Влада.
Овие случаи сега ѝ се префрлени на новата администрација.
Нихад Авад, извршен директор и коосновач на Советот за американско-исламски односи (CAIR), во интервјуто за Анадолу изјави дека Бајден и неговата администрација биле целосно свесни за злоупотребите на човековите права од страна на Израел.
„Интерните извештаи од Стејт департментот и Белата куќа јасно покажуваат дека поранешниот претседател Џо Бајден и поранешниот државен секретар Ентони Блинкен ги прикриле и отфрлиле овие документи“, изјави Авад.
Тој додаде дека тужбите, поднесени во име на палестинско-американски семејства што изгубиле најблиски во геноцидот – извршен со американско оружје – сега продолжуваат под новата Влада.
„Нашата организација поднесе тужба во име на палестинските Американци. Во случајот обвинети се американскиот Стејт департмент, Министерството за одбрана и Белата куќа, а правниот процес се очекува да трае и во 2025 година“, истакна Авад.
Посочувајќи на силното влијание на израелските лобистички групи врз американската Влада и бирократијата, Авад нагласи дека внатрешните извештаи на Владата откриваат дека администрацијата ги прекршила регулативите за воена помош.
Проблемот е што нашата Влада не реагира на овие информации ниту ги користи за промена на јавната политика, појасни тој.
„Главна причина за тоа е влијанието на произраелските лобистички групи врз Владата и неподготвеноста на официјалните лица да заземат став против израелските политики“, нагласи Авад.
Тој, исто така, ги поздрави напорите на претседателот Доналд Трамп да поттикне примирје по неговата изборна победа.
„За жал, иако ги имаа можноста и одговорноста да го запрат геноцидот, Џо Бајден и Ентони Блинкен не успеаја да го сторат тоа. Веруваме дека доколку Камала Харис победеше на изборите, геноцидот ќе продолжеше“, додаде Авад.
