Поранешниот американски претседател Доналд Трамп е „безбеден“ откако тајната служба пукала кон осомничено лице пред клубот за голф во Флорида каде престојувал тој, изјави Стивен Чеунг портпарол на изборната кампања на републиканскиот кандидат.
„Претседателот Трамп е безбеден по истрелите во негова близина. Нема повеќе детали во овој момент“, рече Чеунг.
Изјавата дојде веднаш по наводите дека две лица размениле оган пред неговиот голф клуб во Флорида.
Тајната служба, во соработка со канцеларијата на шерифот на округот Палм Бич, истражува инцидент што се случил непосредно пред 14 часот по локално време, истакна Ентони Гуглиелми началникот за комуникации на американската тајна служба.
Тој додаде дека канцеларијата на шерифот на округот Палм Бич наскоро ќе има повеќе детали.
Бајден и Харис информирани за инцидентот
Претседателот Џо Бајден и потпретседателката Камала Харис се информирани за безбедносниот инцидент на Меѓународниот терен за голф на Трамп, каде што поранешниот претседател Трамп играл голф, соопшти Белата куќа.
„Им олесна кога дознаа дека тој е безбеден. Нивниот тим редовно ќе ги информира“, се додава од Белата куќа.
Харис истакна дека била информирана за извештаите за истрели од огнено оружје во близина на поранешниот претседател Трамп и неговиот имот на Флорида.
„Мило ми е што е безбеден. Нема место за насилство во Америка“, порача таа преку мрежата X.
Синот на Трамп, Доналд Трамп Џуниор, рече дека автоматско оружје АК-47 било откриено во грмушките, повикувајќи се на локалната полиција.
„Кампањата на Трамп објави соопштение потврдувајќи дека поранешниот претседател Трамп е безбеден. Наводно, приведен е еден осомничен“, објави тој на X.
Американскиот сенатор Линдзи Греам рече дека штотуку разговарал со Трамп.
„Тој е еден од најсилните луѓе што некогаш сум ги познавал. Тој е добро расположен и е порешителен од кога било да ја спаси нашата земја“, истакна Греам на X.
На 13 јули Трамп беше повреден во обид за атентат во Пенсилванија.
