Генералниот секретар на НАТО Јенс Столтенберг изјави дека Иран ја нарушува стабилноста во регионот.
На прес-конференција по средбата со американскиот државен секретар Антони Блинкен во Вашингтон, Столтенберг ја истакна важноста на единството на демократските народи и заедничката опозиција против „авторитарните режими“.
Наведувајќи дека безбедноста е глобално прашање, Столтенберг истакна дека НАТО е „од витално значење“ во борбата против глобалните предизвици.
Говорејќи за Блискиот Исток, Столтенберг изјави дека Иран „покажува угнетувачки став дома и агресивен однос кон странство“ и додаде: „Иран е одговорен за дестабилизација на Блискиот Исток, на кој му треба стабилност и безбедност“.
Изразувајќи длабока загриженост за поддршката на Иран за Хутите кои ги напаѓаат бродовите во Црвеното Море, Столтенберг рече дека овие акции носат со себе ризик од ескалација на тензиите во регионот.
Столтенберг смета дека победата на Русија во руско-украинската војна ќе ги охрабри Иран, Северна Кореја и Кина, но и дека ќе претставува сериозна закана за Европа и САД.
Тој ја подвлече важноста на поддршката на сојузниците од НАТО за Украина како инвестиција во нивната колективна безбедност, велејќи:
„Поддршката дадена за Украина не е добротворна акција, туку инвестиција во нашата сопствена безбедност. Претседателот Путин ја започна оваа војна и може да ја заврши денес ако престане да го напаѓа својот сосед. Војната може да заврши ако Украина престане да се брани, но тоа не значи мир, тоа значи руска окупација, а окупацијата не е мир“.
Столтенберг понатаму изјави дека Русија треба да го прифати постоењето на Украина како суверена и независна држава.
„Она што се случува на преговарачката маса е нераскинливо поврзано со ситуацијата на бојното поле. Затоа, ако сакаме траен и праведен мир, мора да и обезбедиме на Украина повеќе оружје и муниција. Давање оружје на Украина е патот до мирот“, смета Столтенберг. .
Тој изрази задоволство што Големото национално собрание на Туркије го одобри полноправното членство на Шведска во НАТО.
Посочувајќи дека САД и НАТО заедно сочинуваат 50 отсто од светската економска и воена моќ, Столтенберг рече:
„Кина и Русија ја немаат моќта на НАТО. Затоа тие секогаш се обидуваат да го поткопаат нашето единство.
