Судот во Њујорк денеска безусловно го ослободи новоизбраниот американски претседател Доналд Трамп од обвиненијата во случајот за исплата на пари на порно актерката Сторми Даниелс, во замена за нејзиното молчење за наводната афера со него.
Оваа одлука на судијата Хуан Меркан значи дека Трамп нема да биде осуден на затвор, условна казна или парична казна.
Меркан рече дека претседателството на Трамп не ја намалува тежината на злосторството, ниту има способност да ја поништи пресудата на поротата, но нагласи дека судот го почитува претседателскиот имунитет.
„Граѓаните на оваа земја неодамна одлучија дека треба уште еднаш да имате корист од оние заштити, кои меѓу другото ги вклучуваат клаузулата за надмоќ и претседателскиот имунитет. Токму низ оваа призма и оваа реалност овој суд мора да ја одреди законската казна. Овој суд утврди дека единствената законска казна што дозволува изрекување осуда, без да се нарушува највисоката функција во земјата, е безусловното ослободување“, му рече судијата на Трамп.
На крајот од рочиштето, судијата му посака и среќа на новоизбраниот претседател во следниот мандат во Белата куќа.
Трамп беше осуден во мај за фалсификување деловни досиеја поврзани со исплати на неговиот поранешен адвокат Мајкл Коен, кој платил 130.000 долари на Сторми Даниелс за да ја спречи јавно да зборува за наводната афера пред изборите во 2016 година.
Трамп ја негираше аферата.
Поротата на Менхетен во мај го прогласи Трамп за виновен по 34 точки од обвинението за фалсификување деловни досиеја за да се прикрие исплатата.
Тоа беше првпат американски претседател, поранешен или сегашен, да биде осуден или обвинет за кривично дело.
За фалсификување деловни книги се предвидува затворска казна до четири години, но затворската казна не е задолжителна.
