Новоизбраниот претседател на САД, Доналд Трамп во понеделникот објави дека Соединетите држави ќе се повлечат од Светската здравствена организација.
Трамп рече дека СЗО не успеала да биде независна од „несоодветното политичко влијание од земјите-членки“ и бара големи плаќања од САД кои се непропорционални со износите дадени од други, поголеми земји, како што е Кина.
„СЗО нѐ крадеше, сите крадат од САД. Ова нема да се повтори“, рече Трамп при потпишувањето на извршната наредба за повлекување, веднаш по неговата инаугурација за втор мандат.
Овој потег значи дека САД ќе ја напуштат здравствената агенција на Обединетите нации за 12 месеци и ќе ги стопираат сите финансиски придонеси за нејзината работа.
Соединетите Американски Држави се убедливо најголемиот финансиски поддржувач на СЗО, со околу 18 отсто од вкупното финансирање, што може да ги загрози клучните програми, како што се борбата против туберкулозата и ХИВ/ СИДА.
Администрацијата планира да бара нови партнери за активности кои претходно ги водел СЗО.
По САД, најголеми донатори на СЗО се Фондацијата Бил и Мелинда Гејтс и Германија, која обезбедува 3 отсто од средствата.
Последниот двегодишен буџет на СЗО, за 2024-2025 година, изнесуваше 6,8 милијарди долари.
Повлекувањето на Трамп од СЗО не е неочекувано. Тој презеде чекори да ја напушти организацијата во 2020 година, за време на неговиот прв мандат како претседател, обвинувајќи ја СЗО за помагање на кинеските напори да го „заведе светот“ за потеклото на Ковид.
Според американскиот закон, напуштањето на СЗО бара отказен рок од една година и плаќање на сите неподмирени обврски.
Светската здравствена организација (СЗО) жали за одлуката на американскиот претседател Доналд Трамп да ги повлече САД од глобалната агенција и се надева дека ќе се премисли, додека ЕУ изразува загриженост за најавата за повлекување и исто така се надева дека одлуката се уште се разгледува.
„Се надеваме дека САД ќе се преиспитаат и навистина се надеваме дека ќе има конструктивен дијалог за доброто на сите, за Американците, но и за луѓето ширум светот“, рече портпаролот на СЗО Тарик Јашаревиќ на брифинг со новинарите во Женева.
СЗО ќе анализира што би значело повлекувањето на САД за нејзините програми, соопшти агенцијата, додавајќи дека е премногу рано да се даваат детали.
„СЗО игра клучна улога во заштитата на здравјето и безбедноста на луѓето ширум светот, вклучително и Американците, со решавање на основните причини за болеста, градење посилни здравствени системи и откривање, спречување и реагирање на здравствени итни случаи, вклучително и појава на болести, често на опасни места каде што другите не можат да одат, рекоа од СЗО.
Европската унија изрази загриженост поради најавата на Трамп за повлекување од Светската здравствена организација.
„Со загриженост ја следиме објавата на Соединетите држави за нивното повлекување од СЗО и веруваме дека американската администрација ќе го разгледа сето ова пред официјално да се повлече“, изјави за новинарите портпаролот на Европската комисија.
Улогата на Светската здравствена организација (СЗО) треба само да се зајакне, а не да се ослабне, соопшти во вторникот кинеското Министерство за надворешни работи, откако американскиот претседател Доналд Трамп најави повлекување од организацијата.
„Кина ќе продолжи да ја поддржува СЗО во исполнувањето на нејзините обврски“, рече портпаролот на министерството Гуо Џиакун на редовната прес-конференција.
