Украинскиот вицепремиер ги советуваше Украинците кои живеат во странство да останат надвор од земјата до пролет, поради зголемената закана од руски напади во текот на зимските месеци.
„За жал, мрежите (електрични мрежи, итн.) не можат да издржат... Ако имате можност да ја поминете зимата во странство, вреди да го направите тоа“, рече Ирина Верешчук за време на телевизиското обраќање доцна во вторникот.
Таа, исто така, тврди дека Русија „се сврте кон терор на цивилното население“, истакнувајќи дека „губи на бојното поле“.
Верешчук, која исто така е министерка за реинтеграција на привремено окупираните територии, истакна дека би сакала Украинците да ги обноват регионите Харков и Херсон и сите други градови и села во Украина „заедно кога ќе дојде пролетта“.
„Да се вратите сега значи да се ставите во ризик себеси и вашите деца, вашите роднини“, рече Верешчук.
Енергетската инфраструктура на Украина е цел на руски воздушни напади од почетокот на војната во февруари.
Украинската влада во четвртокот соопшти дека ќе ја намали потрошувачката на енергија низ целата земја за 20 отсто поради помалото производство од оштетените енергетски капацитети.
Украинскиот претседател Владимир Зеленски минатата недела објави дека 30% од електраните во Украина се уништени од 10 октомври.
