Палестинската Црвена полумесечина во вторникот соопшти дека уште 59 камиони со хуманитарна помош влегле во Појасот Газа преку граничниот премин Рафах.
„Нашите екипи вечерва примија 59 камиони натоварени со помош преку граничниот премин Рафах“, се вели во соопштението на хуманитарната организација.
Во камионите имало храна, вода, хуманитарна помош, лекови и медицински материјали, се наведува во соопштението.
Од почетокот на војната меѓу Израел и Хамас вкупно 217 камиони со залихи со помош, без гориво, пристигнаа во Појасот Газа, се додава.
ОН соопштија дека пред последниот конфликт на територијата дневно влегувале во просек по 500 камиони. Но, сето тоа престана по избувнувањето на борбите во Газа, оставајќи ја палестинската енклава со сериозен недостиг на храна, вода и лекови.
Според проекциите на ОН, потребни се најмалку 100 камиони дневно за 2,3 милиони луѓе кои живеат во Појасот Газа, да се снабдат со основните потреби.
Израелската армија ги прошири своите воздушни и копнени напади врз Појасот Газа, кој е под немилосрдни воздушни напади откако палестинската група Хамас на 7 октомври започна ненадејна офанзива против Израел.
Бројот на загинати од тековните израелски напади во Појасот Газа се искачи на 8.525, соопшти во вторникот Министерството за здравство во блокираната енклава.
„Жртвите се 3.542 деца и 2.187 жени, додека 21.543 други лица се повредени“, изјави портпаролот на министерството Ашраф ал-Кудра на прес-конференција во градот Газа.
Во конфликтот загинаа повеќе од 1.538 Израелци.
